***

ჩამოცვენილი

თმებით, ალბათ, ტოროლა

აშენებს ბუდეს.

***

ჭიანჭველებო,

გასცილდით მაგ ფუყე ხის ქერქს,

რომ დღეს მაინც შევძლო გათბობა.

***

მწყინს! კოღოები

ვეღარ მამჩნევენ, აღარც

მზე მკბენს კისერზე.

***

წელს, მაზუთით

დასვრილ ხეზეც კი, დაიკრიფა

მჟავე ტყემალი.

***

ვჭამ მხოლოდ ბალახს

მაგრამ თმები გაიჟღინთა

მწვადის სურნელით

***

დომინოს ქვების

ხმაზე, მოვიდა ძაღლი

და დაიძინა.

***

ო, როგორ რეკს

ზარს მღვდელი, რომ

გადავიდეს სეტყვის ღრუბელი.

***

მე ვერ გავიგე

შენი შენიშვნა, ჩიტების

ჭიკჭიკს ვუსმენდი.

***

მესაფლავემ დღე

გაატარა მკვდრებთან,

ღამე ლოთებთან

***

ხუმარა შაშვს არ

სწყინდება მეზობლების

გამოჯავრება

***

ო, რა მარტივად

ტყუვდებიან ზაფხულის

ჭიამაიები.